IF i`d go back in time - لو أرجع بالزمن

  • Nudbok Al Amar - Dabke on The Moon (2012)

لو أرجع
دام تستضيف أمل مرقص

سهيل نفار -بيت 1:
قبل ما تقتل ما كانت عايشه
نسرد قصتها بالعكس, من الجريمة للولادة    
جثتها قفزت من الحفرة لحفة الأرض
طلقة طلعت من جبينها وأنبلعت بالفرد
صدى صوتها صرخ, وهي ردّت عليه
  دموعها تصعد من الخد للعينين
من وره غيمة الدخان وجوه العيلة
أخوها, بلا خجل حط الفرد بالجيبة
الأب نزل المجراف دهن عرق عجبينو
وبهزة راس أكتفى من القبر ومقاييسو
جرّوها عالسيارة, هي تضرب بأقدامها
كعاصفة رمال, تمحي أثر دعساتها
دخلوها عالبكاج , مش عارفة لوين
بس عارفة أنهم طلعو 3 وراجعين تنين
وصلو البيت, رموها بعنف عالتخت
( بدك تهربي برّه البلاد آه؟)  صحوها بضرب

أمل مرقص (لازمة)
لو أرجع
بالزمن
كنت ببتسم, بعشق
كنت بغني
لو أرجع
بالزمن
كنت برسم, بكتب
كنت بغني

محمود جريري- بيت 2:
قبل ما تغفى, كانت تحلم
نعكس حياتها علينا, بركن نفهم
عقارب السيعة تتحرك من اليمين لليسار
بتراجع خطواتها متل اللي تاهت بمسار
نامت جاهزة, كم من قرش للتاكسي
تذكرة وجواز سفر تحت الوسادة
الجواب: خلّي الأواعي بالخزانة, بتلبس حياة جديدة 
وأذا سألوها لأيش الحقيبة
وأستأذنت للنوم, قامت عن الطاولة
أكلت منيح, مجبورة تمثل اليوم
الأنف وقّف نزيفو, هيك مبينلهم
بس الجرح طري, قبل ما يثبتوها حتثبتلهم
أمها عاتبتها, حياتك جنة 
صدقت, لما ندوق الممنوع فش أشي بتخبى
سيعتين قبل العشا السماعة أنطرقت, الأم
أنصدمت "قولولها  الطيارة تأجلت" رن التلفون

أمل مرقص (لازمة)
لو أرجع
بالزمن
كنت ببتسم, بعشق
كنت بغني
لو أرجع
بالزمن
كنت برسم, بكتب
كنت بغني

تامر نفار-بيت 3:
قبل ما تخطب ما انسألت, سرد قصتها
كالمعايير بحياتها – أنعكست
أيديها قبال وجهها, طالبة النجدة
أيدين الحواليها قبال وجههم, بقرؤا الفاتحة
ورقة الرزنامة انقلبت يوم لورا
سيعة مسا, النقاش أنتهى, أخوها أمر
شلال دم بجري من شفايفها وبنصب بالأنف
صوت لكمة, من وجهها أنطلقت أيد الأخ
لأول مرة بحياتها بترفض
أمها أعلنت بفرح "بكرة أبن عمك جاي يطلب"
أذا بمسك ألبوم حياتها وبقلّب
ما بصدف صورة فيها هي ماخدة موقف
مستصعب, الصفحات بأيدي تلزّق
الماضي ملطّخ بدم وعيون تدمّع
بس وعدتكم, من الجريمة للولادة, وجوههم غاضبة
كأنه خبروهم بجريمة "مبروك, أجتكم بنت"  ------ البداية 

أمل مرقص (لازمة)
لو أرجع
بالزمن
كنت ببتسم, بعشق
كنت بغني
لو أرجع
بالزمن
كنت برسم, بكتب
كنت بغني